آذربایجانین بوگونکو دورومو ، اینسانی دیله گتیریب و مجبور ائدیر درد اوزوندن ، بیر پارا سؤزلری آرایا گتیره ک.
بیز بیر آذربایجان تورکی اولاراق ائیلیه بیلمه ریک اوتوروب و باشیمیزا گلن لره نیظاره ائده ک. بئله دییه ر لر که تاریخی بونا گؤره اوخویوروق کی اوندان عیبرت آلیب و اونلارا باخاراق ، گلجکیمیزه یول سئچیب و داها یانلیشلیق لارا ایاق قویمایاق. اگر بئله اولماسا تاریخ عیلمی بوتون فایداسیز بیر مسئله دیر.
هر نه دن اؤنجه ایسته ییره م دییه م کی بو یازی دا ، بیر پارا یالان یولان و یا اؤزوموزو آلدادان تعارف لاردان خبر یوخدور. نه زامانا کیمین اؤتورب اؤزوموزو آلایا گؤیه چیخارداجاییق؟ نه زامانا کیمین بیز ائله ییک ، بیز بئله ییک دئمک لر ایله ، هئچ ایش گؤرمه ییب و یالنیز اؤزوموزو آلداداجاییق؟
بو خاطیرلاتما ایله گئدیریک یازی نین باشلانیش نوقطه سینه.
ایندیسه آذربایجانین بیر بویوک حیصصه سینده توپراقلاریمیزا قوناق گلن و اوتانمازجاسینا اؤزلرینی ائوصاحابی فرض ائدن  کوردلر مسکن ائدیب ، یاشاییرلار. بو کوردلرین چوخلی ضررلری بیزیم میللتیمیزه و توپراقیمیزا اولماقیندا سؤز یوخدور و امینم کی بونو هامی بیلیر. آمما بو کوردلرین رفتارلاریندان ائیلییه بیله ریک بیر یاخشی ایستینباط چیخارداق. او دا بو کی تاسسوف لا دئمه لی ییک کی بیز آذربایجان لی لار چوخلی ساحه لر ده بو کوردلردن گئری قالمیشیق.
هر نه دن یوخاری و موهوم مسئله ده یئنه ، میللی مساله دیر. یادیما گلیر نئچه ایل بوندان قاباق اورمو شه هه رینده ، کوردلر ایله تورکی دانیشاندا ، اونلاردا سن ایله تورکی دانیشاردیلار (95% بئله ایدیر) آما ایندیسه کوردلر ایله دانیشاندا ، چتین قاباغا گلیر کی اونلار چونوب بیز ایله تورکی دانیشالار. یا فارسی دانیشیرلار و یا دا کوردی دیل ایله.
آمما بیر تورک شخصی نظرده آلین ، صوحبت طرفی تورکی دانیشماق ایسته مه یه ن یئرده ، در حال ، چونوب و فارسی دانیشیر. من اؤزوم گؤزوم ایله گؤرموشه م ، طرف مندن یاخشی تورکی باجاریر ، آمما کورد تعصصوبو قویمور تورکی دانیشسین آما اونو تورک هم صوحبتی راحات چونوب و اون ایلا بیر مسخره لهجه ایله فارسی دانیشیر  ، ائله بیر مجبوردیر فارسی دانیشسین!؟
عزیزلر کاش بیر نفر تاپیلیب و منه بو مسئله نی آیدینلاتسین کی ندن کوردلر ده اؤز آنا دیل لرینه دانیشماق ایشتییاقی بیز تورکلردن چوخدور؟
ندن کوردلر بئبه لن آنلاییرلار کی توی لاریندا یالنیز کوردی ماهنی لار و اوخومالار ایشله درلر. آمما تورکلر هئچ اولماسا نئچه دنه کوردی اوخوماق دا کوردی جالمان اوچون ایشه آپاریرلار!؟ بیزیم موسیقی میزین نه یی دیر کی گئدیریک کورد موسیقی سیندن یارارلانیریق؟ ندن اونلار بیزیم موسیقی دن فایدالانمیرلار؟ میللی دوشونجه نین ایزی نی بو مساله ده گؤرمورسوز؟
بیزیم قویودان چیخان و چالایا دوشن لریمیز ندن فارس موسیقی سیندن آیریلاندان سونرا ، تورکییه موسیقی سینین قوجاغینا دوشورلر ، مگر بیزیم اؤز وطنیمیزین اؤزونه موسیقی سی یوخدور؟ ندن آذربایجان تورکجه سینده یاییلان ماهنی لاری بوراخیب ، تورکییه ماهنی لاریندان ایستیفاده ائدیریک؟
ندن بیر کورد بونو آنلاییر کی او یازی لار کی یالنیز قراردیر کوردلر اونلاری اوخوسونلار ، گرک کورد دیلینده یازیلسین ، اؤرنک اوچون او یازی لار کی گروپلار و پارتیالار آراسیندا توققوشمالاردان عیبارتدیر. آما آذربایجان تورکو هله دیر کی هله بو مساله نی دوشونمویوب!؟ (آذربایجانلی سیته لر ده سیاسی پارتیالارین اؤیه لرینین آراسیندا سؤزلرین یاری دان چوخو فارس دیلینده دیر و بو بیر بویوک عیب دیر)
«ممالک محروسه ایران» زامانیندان قالان اوچ رنگ بایراق (یاشیل ، آغ ، آل) ندن گرک بیزیم آرامیزدان قالدیریلسین و یئرینه یئنی بیر بایراق اوتورسون؟ بو اوچ رنگ بایراق (یاشیل ، آغ ، آل) نئچه یوز ایل ، ایران دا تورک حاکیمیت لرین بایراقی ایدیر ، ندن ایندیسه گرک آرادان گئتسین؟ تورک نادیر شاه قالدیران بایراق ، بویوک تورک سلطنتی قاجارلار قالدیران بایراق ، ایندیسه بیزیم ده بایراقیمیزدیر. یالنیز ایسلام جمهوریتی نین سمبولو آرادان قالدیرمالی دیر ، او دا بیر رفراندوم دا.
آذربایجان جمهوریتی نین بایراقی ان موقددس بایراق دیر ، آمما قوزئی اوچون. بیزیم او بایراقین یارانماسیندان نئچه یوز ایل قاباق بایراقیمیز وار ایدی و ایندی ده واریمیزدیر. خیریم خیردا پارتیالارین بایراق لاری دا کی هئچ. بوتون اوتاندیرما سبب لری دیرلر. بیلمیرم بو خیریم خیردا بایراق لاری (گاموح ، گایپ و باشقا گروپلارین بایراقلاری) چیخاردانلار نه اوز ایله بو ایشی گؤرورلر؟ گؤره سن اوتانمیللار؟ مگر بیز آذربایجان میللتی دونن ، ایره لی گون تشکیل تاپیب و تاریخی یوخدور کی اوتوروب و اؤزونوزو بئله بیر پخمه لیغا وورورسوز؟ (هئچ اولماسا گئدین و تاریخی اوخویون گؤرون رحمتلیک پیشه وری نین حکومتی نین بایراقی نمنه ایمیش)
ندن آذربایجان میللتینه بئله بیر قوندارما بایراقلار تحمیل اولونور؟
ندن کورد لرین اینترنت ساحه سینده سیته لرینین گؤروشچولری بیزیم سیته لریمیزین زیارت ائدن لرین دن چوخدور؟ (دییه بیله رم ایکی باراباردیر) میثال اوچون روژه هلات سیته سی دونیادا 200 مین اینجی سیته دیر آما بای بک ایله آزادتریبون ایله دورنا سیته لری (لاب چوخ ترافیکلی سیته لریمیز) 350 مین اینجی سیته لردیرلر؟
ندن آذربایجانلی فعاللار ایچینده بیر سیرا دوشونمز اینسانلار ایسته ییرلر ، ائششه یی آلمامیش پالانینی باغلاسینلار؟ آخی بیز آذربایجانلی لار نمنه اله گتیرمیشیک کی فلان شخصیتلر قالخیب لیدرلیک ایددعاسی ائدیرلر؟
ندن بیزیم پارتیالاریمیز (اگر پارتیا آدی اونلارین اوستونه قویا بیلسه ک) دموکراسی ایله تانیشلیق لاری یوخدور؟
داها غیری دموکراتیک ایش لرین دورانی گئدیب. ندن بونو بیلمیللر؟