آذتورک

قیزاران (خرداد) آیین سون گونلرینده ، ایران ایسلام جومهوریتینده کئچیریلن سئچیملر و یا داها دوغروسو بیعتلشمه لردن سونرا ، میللی حرکتیمیز هانسی یولدا آتدیم آتمالیدیر؟

حورمتلی اوخوجولار ! ایستر ایستمز ، بو سئچیملر ده چوخلی آذربایجانلی ایشتیراک ائتدیلر و بیز بو یازیدا ایسته ییریک بو ساحه ده و بو ایشتیراکین ندنلری باره سینده دانیشاق.

هر نه دن اؤنجه بونو قئید ائتمه لی ییک ، کی بو اولای یالنیز بیر بیعتلشمه آدلاندیریلا بیلر و بیر سئچیم دئییلدیر ، نیییه کی سئچیمی آنا یاسا کئشیکچیلر شوراسی (شورای نگهبان قانون اساسی) یاپیب و صندوق باشینا گیدنلر ، بو شورانین اونایلادیغی و سئچدیکلریندن بیریسی ایله بیعت ائدیبلر. آیا بو سئچیملرده سولچی لاردان آدای اولان وار ایمیش؟ و یا نیظام ایله موخالیفت ائدنلردن ایشتیراک ائده بیلمیش؟ بیز آذربایجانلی لارین حاقلارینی ساوونان بیریسی ، ائیلیه بیلمیش بو یاریشمایا (سئچکییه) قاتیلسین؟ بیر کلمه ده بیر جومهوری اولاراق بوتون باخیشلارین تمثیلجیسی وار ایدی؟ خئیر. بئله لیک ایله بو اولایی سئچکی آدلاندیرما یالنیشدیر ، هر حالدا بیز بو ایددعادان واز گئچیب و بو اولایی بیر سئچکی کیمین دیرلندیرمک ایستیریک.

ایندیسه بیر باخیش دا آدای لارا کیملر اؤی وئرمیش ، ساحه سینه کئچیریک.

میر حوسئین موسوی

1 – ایصلاح طلب لر و خاتمی چی لر

2 – ایصلاح طلب اولمایان ، احمدی نیژادین موخالیفلری

3 – نیظامین اوپوزیسیونو و یا سلطنت طلب لرین بیر طئیفی

4 – اصول گرالارین و موحافیظه کارلارین بیر طئیفی

5 – بیر بویوک حیصصه میللیتچی اولمایان آذربایجانلی لاردان ، صیرف تبریزلی اولماغی اوچون

6 – بیر سیرا هویت طلب لر

ماحمود احمدی نیژاد

1 – اصول گرا لار و موحافیظه کارلار

2 – رفسنجانی نین موخالیفلری ، موسوی رفسنجانی نین آدامی اولماغی اوچون

3 – بیر بویوک حیصصه میللت دن ، دوققوزونجو دئولتین یاپدیکلاری اوچون (بویوک خیدمتلر آدلانان یاپدیکلار)

4 – یهودیلر و اونلارین بویوک لابی لری

دیگر آدای لار

یانداشلاری (طرفدارلاری) و بیر سیرا اینسانلار لار کی اونلارین وئردیکلری سؤزلره اینانج لاری وارمیش.

تحریم ائدن لر

1 - سلطنت طلب لر و نیظامین موخالیفلری

2 – بیر حیصصه میللتدن کی سیاسال ایشتیراکا اینانج لاری یوخدور

3 – توپلومون (جامعه نین) سوننتی قیسمینین بیر حیصصه سی (اؤرنک اوچون کندلرده قادینلار)

4 – بیر حیصصه میللتدن کی سئچکی لرین یارارلی اولماسینا اینانجلاری یوخ ایدی

ایندیسه یالنیز میللی حرکتیمیز ساحه سینده بو سئچکی لری دیلندیریریک.

هویت طلب لر نئجه حرکت ائتدیلر؟

1 – بیر قیسمی موسوی یانداشی اولدولار

بو قیسمین باخیشی تأسسوف له میللی حرکتیمیزین اوغروندا یوخ بلکی یالنیز بو آدامین آذربایجاندا دوغولماسی اوچون دور ، کی اونا باخسان خامئنه ای ده آذربایجان کؤکنلی دیر ، آما بیزلره نه یاراری وار؟

آتا بابالاریمیز بیزه دئییب ، بیرینین نه جور اولماقین بیلمک اوچون ، یولداش لارینا باخ. میر حوسئین موسوی کیملرین طرفیندن حیمایت اولونور!؟ رفسنجانی و خاتمی. ایکی نیژادپرست و آنتی آذربایجان. بئله لیک ایله بیر آذربایجانلی نئجه بو آدام دان و یا داها دوغروسو رفسنجانی و خاتمی یه اؤی وئریر ، تعججوبلانمالی دیر.

2 – بیر قیسمی کرروبی یانداشی اولدولار

بو قیسم کرروبی نین قومییت لر باره سینده وئردیغی سؤزلر اوچون اونا سس وئرمیشلر.

بیزجه بو باخیش دا یالنیش اولمالیدیر ، نییه کی اگر بو کرروبی بو سؤزلرین آدامی اولسا ایدی ، دؤرد ایل پارلمان باشچیسی اولاراق و پارلمان اونلارین جیناحینین الینده اولاراق ، بو ساحه بیر قانون کئچیره بیلردیلر ، کی بو ایشی گؤرمه دیلر.

3 – بیر قیسمی سئچکی لری تحریم ائتدیلر

بو قیسم آذربایجانین ایستکلری و حاقلارینین رد اولونماسی اوچون سس وئرمه دیلر. اؤرنک اوچون آذربایجانلی لارین موطالیبه لرینین کفی اولاراق ، جناب  اکبر اعلمی صلاحیت آلمالی ایدی. اعلمی یه صلاحیت وئرمه مک ، آذربایجانلی لارا بیر بویوک یوخ دئمک اولدو.

البتده یازیچی نین اینانجی بودور کی حتتا اعلمی ده بیزیم میللی حرکیتیزین تمثیلجیسی اولا بیلمزدیر ، آما گئچیجی اولاراق ائیلیه بیلردیک اوندان ایستیفاده ائدک. سیاست ساحه سینده چیخارلار ، هزینه سیز ، الده اولماز.

4 – بیر قیسمی ایعتیراض ائتمک اوچون ، سئچکی ده ایشتیراک ائدیب و اؤز حاقلاریندان باطیله رای فورماسیندا قوللاندیلار

بو قیسم تحریم یولونون یارارلی اولماسینا اینانماییب و سئچکی لرده ایشتیراک ائدیب و رای کاغاذیندا آدایلارین آدین یوخ ، بلکی اؤز ایستکلرین یازدیلار.

هر حالدا میللیتچی باخیش ایلا ، آذربایجانلی لار ، ماحمود احمدی نیژادا سس وئرمه مه لی ایدیلر. آما موطمئناً اونا دا آذربایجاندا سس وئرن اولدو. کی بو دا بیز میللیتچی لرین سورونو و قوصوروموزدور. بیزیم دوزگون و اوصول لار ایلا حرکت ائتمه مه میز ، احمدی نیژادا ، آذربایجاندان سس قازاندیردی.

سئچکیلردن سونرا گؤستریلر (تظاهوراتلار)

سئچکیلردن سونرا ، میر حوسئین موسوی نین یانداشلارینین آیاقلانماسی ، ایران ایسلام اینقیلابیندان سونرا اینانیلماز بیر اولای اولاراق ، بوتون دونیانین دیققه تینی اؤزونه چکدی.

آما منجه ، بیز بو گؤستریلره ایشتیراک ائتمک مجبورییتینده دئییلیک. بو ایعتیراضلار ، آذربایجانلی لارین چیخارلاری ایلا ، یول بیر دئییل. نهایتی بودور کی عیرقچی (نیژادپرست) احمدی نیژاد گئدیب و دیگر عیرقچی موسوی اونون یئرینه گلجک. بو آرادا بیزه نه قالاجاق؟ وئردیغیمیز هزینه نین قارشیلیغین هارادا آلاجاییق؟

بیر سیرا دوستلار اؤنه ریللر بو گؤسته ریلرده ایشتیراک ائدیب و مثلن شوعار وئرک: «تورک دیلینه مدرسه اولمالی دی هر کسه!» قارداشلاریم بو شوعار یاخشی سؤزدور. آما نه ایلگی سی وار ایندیکی موناسیبتلره!؟ ایصلاح طلب و موحافیظه کار ساواشیندا بو شوعارین نه یئری وار؟ هئچ بو شوعارلاری ائشیتمک ایسته ینلر وار؟ سن بو شوعاری دا وئرسن ، مئدیالار (پان فارسیست مئدیالار) اونو یالنیز موحافیظه کارلارا موخالیفت آدلاندیراراق یاییب و سنین حاقلاری یین قورومویاجاقلار. یالنیز بیزیم وئردیغیمیز هزینه لر قالاجاق و بیر بویوک پئشمانلیق.

آیا بیز گؤستریلرده شیرکت ائتمه ییب و بونا داییر هرنه نی بایکوت ائتمه لی ییک؟ خئیر. منجه بیز بو اولایلاری یاخین دان تعقیب ائتمه لی ییک. و بو ماجرادا یالنیز غئیری دئموکراتیک اولان ایشلری پیسله ییب و دئموکراتیک ایشلری اؤنرمک ایله ، حرکتیمیزین دئموکراتیک اولماسینا داییر تبلیغ ائتمه لی ییک. بیزیم مقاله لریمیزده ، بیاناتیمیزدا ، دئموکراتیک بیر سئچکی نین اولماسی طلب اولونمالی دیر. سئچکی لردن سونرا ، اعتیراض ائدنلر ایله دئموکراتیک بیر یوللار ایله رفتار اولونماسی طلب اولمالی دیر. البتده اعتیراض ائدنلر ده دئموکراتیک یوللار ایله رفتار ائتمه لیدیرلر.

بو اولایلارین سببی و ندنی ندیر؟

منجه بو اولایلارین ایکی بویوک سببی وار و بو بیر بویوک اویون دور و بیز ساده جه اویونون دیشارسینی گؤروروک و ایچیندن خبریمیز یوخدور.

بیرینجسی رهبری داعواسی دیر

ایکینجیسی ایرانین نووه (هسته ای) پروگرامینین اوستونو اؤرتمک دیر

بیرینجی سیندن باشلایاراق ، بونو ایضاح ائتمه لی ییک کی ایران دا سیاسی قودرت موازنه سی پوزولماک عرفه سینده بو چاتیشمالار باش وئردیلر.

عزیز اوخوجولار دیققت ائتمه لیدیرلر ، 1360 ـینجی ایلدن بری ، هر زامان سیاسی قودرت ، خامئنه ای و رفسنجانی آراسیندا بؤلونموشدور. اینتیصابی مقام لار هر زامان خامئنه ای نین الینده و مثلن اینتیخابی مقام لار دا رفسنجانی نین الینده اولوب. 1360 دن 1368 ایلینه قدر دئولت میر حوسئین موسوی (یعنی رفسنجانی نین آدامی) نین الینده ایدی ، 1368 دن 1376 ایلینه قدر دئولت رفسنجانین نین اؤز الینده ، 1376 دن 1384 ایلینه قدر ده موحممد خاتمی (یئنه رفسنجانی نین آدامی) نین الینده اولدو. آما 1384 ـونجو ایلدن بری خامئنه ای بو اویونو پوزوب و اؤز آدامینی ایش اوستونه گتیردی. بو سئچیملرین ساختاکارلیقی هامییا آشیکاردیر. بؤيوک رسول اوغلو جنابلاری گؤزل مقاله لرینده  «اونونجو سئچيم، سونونجو سئچيم!» آد ایلا بو مسئله لری یاخشیجاسینا آچیقلاییب ، هر حالدا ایجازه لری ایله یازینین بیر پارچاسینی بورادا درج ائدیریک.

کئچن سئچگيلرين بيرينجي و ايکينجي مرحله سينده کي سس داغيليمي آشاغيدا گؤستريلميشدير. بو رقملرين آناليزي بو دفعه کي سئچگيلرين ساخدالاشديريلديغي نين گؤستريجيسي اولا بيلر.

                   (بيرينجي مرحله )

-علي اکبر هاشمي رفسنجاني، ۶.۱۶ ميليون سس.

-محمود احمدي نژاد، ۵.۷۱.

-مهدي کروبي، ۵.۷.

- باقر قاليباف، ۴.۷.

-محمد معین، ۴.۵.

-علي لاريجاني، ۱.۷۴.

-محسن مهرعليزاده، ۱.۲۹.

جمعي، ۲۹.۸.

                  ( ايکينجي مرحله )

-محود احمدي نژاد، ۱۷.۲۵ ميليون سس.

-علي اکبر هاشمي رفسنجاني، ۱۰.۰۴.

                  جمعي، ۲۷.۲۹.

بو رقملر اؤزو اؤزلوگونده، گئچن سئچگيلرده کي ساختاکارليغين بير نيشانه سي اولدوغو کيمي بو سفرکي سئچگي نتيجه لرينينده اويدورما اولدوغونو آچيقجا گؤسترمکده دير. بيرينجي مرحله ده ايصلاحاتچيلارا ياخين نامزدلرين توپلام سسي تقريبن ۲۰ ميليون اولدوغو حالدا، ايکينجي مرحله ده احمدي نژادين قازانماسي نئجه موموکون اولار. او دؤنم، کروبي و رفسنجاني، ساخدالاشديرمايا قيسيتلي اعتيراض ائتسه لرده ايکي دليله گؤره باشيني قوومداديلار.

بيرينجيسي: او اؤلکه ده کي پريميتيو سئچگي سيسته مي، پروتوکول حاضيرلانماسي و نتيجه ائلانلاري کونترولا ايمکان وئرمه ديگينه گؤره، اعتيراضلارين نتيجه سيز قالاجاغي.

ايکينجيسي : هر حالدا رئژيمين داخيلينده کي قروپلارين هانکيسي نين پرئزيدئنت اولماسي نين ايسلام جومهورييتي اوچون بؤيوک فرقي نين اولماماسي.

ایندیسه بیر سوال آرایا گلیر. بیر گؤستریلر کئچن سفر ندن اوز وئرمه دی؟ آما بو سفر اولدو؟ آیا کئچن سفر پرده آرخاسیندا ، آلیش وئریش لر ، مسئله نی بیتیردی؟ و یا باشقا مسئله وار ایدی؟ بو سوالا زامان جاواب وئردی. و گؤردوک کی خوبریگان باشقانی (علی مئشکینی) اؤلندن سونرا ، بو مجلیسین باشقانلیقی ، رفسنجانیه وئریلدی. بو مقام دئولت باشقانلیقی نین الدن وئریلمه سینین یئرینه رفسنجانیه وئریلدی. و بئله لیک ایله قودرت ترازی سیندا ، خامئنه ای و رفسنجانی نین آراسیندا بیر موازینه یاراندی. بو مسئله لردن سونرا رفسنجانی نین ، شورای رهبری ، دن دانیشماسی ، مسئله لری بیر آز چتینلشدیردی. نئجه کی یئنه خبرلرده واردیر رفسنجانی یئنه بئله بیر سؤزلری آرایا گتیریب. بو خامئنه ایه بیر بویوک ضربه اولاراق ، طبیعی کی خامئنه ای نین ده حمله سینی لازیم و گرکلی گؤسته ریر. و بو حمله یالنیز و یالنیز نیظامی قووه لرین یاردیمی ایلا ایجرا اولونمالی دیر. احمدی نیژادین سئچکی لرده غالیبییتی بو ندنلر آردیندا گرچکلشدیریلدی.

بیر ایلگینج (جالیب) مطلب بو آرادا دئییلمه لیدیر و او دا ، بو آرادا ایرانین نووه پروگرامینین گیزلی و خبرلردن چیخاریلماسی دیر. چوخ جالیب دیر هر سفر ایرانین نووه پروگرامی دونیا سوییه سینده سسلننده و دونیا بیرلیکده ایرانا قارشی دوراندا ، بیر اولای اوزوندن ، ایرانین نووه پروگرامی خبرلردن اوزاقلاشدیریلیر.

بیر سفر گووه نلیک کونسئیینده (شورای امنیت) ایرانین علیهینه بیانیه وئریلن زامان ، اورتا دوغو (خاورمیانه) بیر بویوک ساواشا گیردی. لوبنانلی حیزب الله ایله ایسرائیل چاتیشمالاری باشلاندی. هر حالدا بو ساواش کیمین منفعتینه و چیخارینا سبب اولدو ؟ ایرانین. اینسان بئله ظن ائدیر بو ساواشی و چاتیشمانی دا ایران یولا سالمیش.

بو سفر ده دیققت ائدین ایران بو اولایی اؤز توپراغیندا یاشاتدی. خبرلرده وار ایدی ، البرادعی دئمیش ایران هسته ای سیلاحا دوغرو گئدیر. موحافیظه کار و موحتاط البرادعی بو سؤزو دئین زامان ، ایش بویویوب دئمکدیر. آما ایرانین سئچکیلر جریانی و اویونو ، بو خبری تحت الشعاع قرار وئریب و گیزله دیر و حتتا بوتون دونیانی او خبردن اوزاقلاشدیریر. بو اولایلار یئنه ایرانا منفعت یارالدیب و ایرانا زامان قازاندیریر.

موسوی نیظاما قارشی اینقیلاب لیدری اولماق ایسته ییر؟

منجه بو سورونون جاوابی نی ، موسوی نین اؤز سؤزلریندن آلمالی ییق. موسوی بیر شخص دیر کی نیظاما کامیل اینانجی و اعتیقادی واردیر. و اؤز دئدیغی کیمین یالنیز نیظامین ، خومئینی زامانینداکی کیمین اولماسی اوچون آرایا گلیب. خومئینی زامانیندا بیز آذربایجانلی لار ، وضعیتدن نه فایدا گؤردوک کی ایندیسه هزینه وئره رک موسوی بیزی او دئوره آپارسین؟؟

موسوی ایستر استمز ، نیظاما قارشی آیاقلانانلارین و بو نیظامین موخالیفلری نین تمثیلجیسی اولوب ، آما لیدرلری دئییل و اولا بیلمز و بونو یئنه زامان گؤسته ره جک. نئجه کی خاتمی ده بو اویونو اوینادی و میللتی سگگیز ایل آلداداندان سونرا ، اونون دئولتیندن هئچ بیر فایدا گؤرونمه دی. بیز آذربایجانلی لارا بویوک ضربه لری ووروب و بیزی داها اؤزدو. ایندیسه اونون کوپیاسی ایش اوستونه گلیرسه ، نه اولاجاق!؟

آیا موسوی نین یانداشی اولمایان ، احمدی نیژادی و ایستیبدادی دستکله ییر؟

بو سورغونون جاوابیندا قطعییت ایله دئمه لی ییک: یوخ. بیر مورتجیع و ایستیبداد ایچیندن گلن آدام ایله ، ایستیبدادین ساواشینا گئتمک اولماز. او دوستلاریمیز کی بئله بیر ایستیدلال ایله ایسته ییرلر ، آذربایجانلی نی خیاوانلارا چکسینلر ، یا آذربایجانین چیخارلاری اوغروندا چالیشمیرلار و یا او قدر سیاست سیز داورانیرلار کی آغ و قره دن سونرا بیر رنگ گؤره بیلمیرلر. سیاست یالنیز آغ و یا قره دئییل. اگر بو موسوی نیظامین موخالیفی اولسا ایدی ، اونونلا گئچیجی ده اولاراق یول بیر اولابیلردیک ، آما او زامان کی بو آدام بوتون اینانجی ایلا بو نیظامین یولوندا چالیشماک ایسته ییر بیز ایله اونون نئجه یولداشلیغیمیز اولا بیلر؟

ایندیسه بیز میللیتچیلر و آذربایجانلی لار نئیله مه لی ییک؟

منجه بیز بوتون گوجوموز ایله گرچکلری بیان ائتمه لی و میللتیمیزی آیدینلاتمالی ییق. غئیری دئموکراتیک اولان ایشلری پیسله ییب و دئموکراتیک ایشلری اؤنرمک ایله ، حرکتیمیزین دئموکراتیک اولماسینا داییر تبلیغ ائتمه لی ییک. بیزیم مقاله لریمیزده ، بیاناتیمیزدا ، دئموکراتیک بیر سئچکی نین اولماسی طلب اولونمالی دیر. او زامان کی دئموکراتیک بیر سئچیم یوخدور و اؤزلری دؤرد آدامی سئچیب و بیزلره بونلاردان بیریسی ایله بیعت ائتمک قالیر ، هزینه وئرمک و بو یارارسیز اولایین یولوندا خطرلری گؤزه آلماق ، عاغیللی دئییل.

بیر آیری سؤز ده بو کی ، لوطفن ایران دا اولمایان دوستلار ، میللتی بوشو بوشونا کوچه لره و خیاوانلارا چکمسینلر ، دوز دئییرسیز بویورون گلین بیرلیکده خیاوانا چیخیب ، شوعار وئرک. خاریج ده ایله شیب و شوعار وئرمک چوخ راحات دیر. آذربایجانلی پارتیا و قروپلاردان ایکی سی بئله ایش گؤروب و میللتی خیاوانلارا دعوت ائدیب ، کی ایکیسی ده خاریج ده اولان قروپلاردان دیر. بو گؤسته ریر ، بونلار ایچه ری نین دورومونو یاخشی آنالیز ائده بیلمیرلر.

یاشاسین آذربایجان

یاشاسین آذربایجان اوچون چالیشانلار

قوراپیشیرن (تیر) آیین دؤردو – آذتورک (www.azturk.blogfa.com)